Vairengte daia ZDU office hawn a ni


"Ramin harsatna a tawh laia mi pawimawhte chu Driver te hi an ni"
                           -C.Lalrambuatsaiha MJA President

Nimin khan Vairengte daia Zoram Drivers Union in In an sak chu MJA President C Lalrambuatsaih’an a hawng a,  MJA President chuan, " Ramin harsatna a tawh laia mi pawimawhte chu driver te hi in ni a, Inter state boundary a harsatna a thlen changa inkawmna hmun tur ZDU ten in tha tak in sa hi a lawmawm hle a ni," a ti a. ZDU in in an sak hi Lok Sabha MP CL Ruala'n cheng nuai 10 a pek atanga an sak a ni.

MJA President chuan Mizoram damkhawchhuahna tur 90% deuhthaw chu driver te kuta awm a ni tih sawiin, driver zingah mi tlawmngai leh ram leh hnam tana mi thahnemngai tak tak an tam hle a ni a ti a.
Driver te chu chanchinbumite tan an pawimawh hle tih sawiin, "Mizoram hmun hrang hranga man chawi lova chanchinbu min phurhsaktu in ni a, in tello chuan chanchinbu pawh kan kal thei lo a ni," a ti a. Internet khawvelah cheng tawh mah ila, driver te chu ram tana mi pawimawh an la nih reng thu te, ram leh hnam tana an ngaihtuahna senga hma an lakna avangin ZDU te chungah lawmthu a sawi a. ZDU in ramthim board an din leh hnuchham in dina hma an la chu lawmawm a tih thu sawiin, " ZDU te hi Krista rilru putute in ni," a ti bawk.

ZDU General Secreatary Lalramhluna Sailo chuan report pein, ramri a harsatna a thlen changin, Mizoram lam ramriah meeting na hmun remchang a awm that tawk loh avangin Cachar lamah meeting neia an kal fo a ngaih thu a sawi a. Kum 1999 a ZDU in Vairengte Kawngthar veng a an ramah in sak dan an zawn thu leh a sakna tur pawisa chu CL Ruala MP (LS) hnenah cheng nuai 5 an dil laiin CL Ruala chuana pawimawhna hriaa cheng nuai 10 a lo pek avangin in tha tak an sa thei niin a sawi a, CL Ruala chungah an lawm takzet tih a sawi bawk.

ZDU In hawnna hi VL Malsawma, President ZDU Gen Hqrs in a kaihruai a, Aizawl atangin MJA president bakah Vice President Vanlalrema Vantawl bakah member 12 in an tawiawm a. Heng bakah hian Kolasib MJA, Vairengte MJA leh Vairengte a NGO hrang hrang leh sorkara mi pawimawh engemawzat an tel a ni.

The Lawngtlai Post

Lalngheta Ralte (Ma-Ngheta) Electric Veng, Lawngtlai , Lawngtlai Dist. Phone: 9862843773 e-mail:lalnghetaralte@gmail.com

Post a Comment

Previous Post Next Post