Wednesday, February 29, 2012

Chapchar Kut / Hlukhla Lawngtlai ah hmang turin ruahmanna peihfel thawhkhat a ni tawh.

March Ni 2 a Chapchar Kut / Hlukhla, Lawngtlai a hmanna tur atan ruahmanna peihfel thawhkhat a ni tawh, nimin khan Kut Organising Committee chu an Chairman Pu B.Lalhmingthanga DC ho in an thukhawm a, mawhphurhna thahnem tak changtu Central YLA lam chuan ruahmanna an neih te sawiin, Programme tur duanlawk te thlir ho nghal niin, siamdanglam ngai tlem awm te an siamdanglam nghal a, Central YLA lam chuan Hnam ziarang pholang thei Hnam lam leh Zai te a tam thei angber Kut ah hian pholan a nih theih nan a ruahmanna an siam te chu a tawp an thleng tawh in inbuatsaihna dang an kalpui mek te pawh an sawilang bawk. Tarlan tawh angin Kut hi Central YLA Playground ah hman a ni dawn a, chawhma dar 10 ah tan a ni anga, Kut Pa atan Pu C.Ngunlianchunga CEM, LADC hman a ni anga, Kut thlengtu chu DC, Pu B.Lalhmingthanga a ni ang. Organising Committee chuan Kut a tel chuan Hnam ziarang pholang thei thawmhnaw inbel thei se an duh a, Kut hi mitin ten hlim taka an hman theih nan ruahmanna siamin, a tam thei ang ber mipui tel turin an beisei. Nimin a Committee thutkhawm hi a tum thumna niin, member kal pawh an thahnem hle a ni.

CAG Report 2008 nimin khan CEM ho in sawiho lawilawk a ni

Nimin chawhnu khan CEM Pu C.Ngunlianchunga ho in, a Office Chamber ah Pre-Discussion of Comptroller and Auditor General of India 2008 neih a ni a, Department kaihhnawih a Executive members te leh Officer te he CAG Report 2008 sawiho lailawkna ah hian an tel a, nimin a sawiho zing ah LADC ah Officer leh Staff tam lutuk vang a Development Fund a tlem ni a CAG a tarlan chungchang te, Revenue Department leh Forest Department ten an hlawh atanga chhutin Revenue 7% chauh an hmuh thu te leh Centrally Sponsored Scheme a nih tur anga hman loh a awm ni a tarlan te chu a langsar zual an ni.

Zirlai Naupang 42 Excursion

Nimin zing dar 5:30 khan RMSA Lawngtlai District hnuaia High School Zirlai naupang 42 te chuan Excursion nei turin Lawngtlai an chhuah san,heng zirlai naupang te hian Mizoram tuikhawh thla sang ber Vantawngkhawhthla, Chawngchilhi puk te leh Historical site hrang hrangte tlawhturin Bus pakhat leh Sumo pahnih hmangin an kal a,Heng Excursion a kal te hi RMSA Office bul atanga chhuakin,an chhuah hma hian Pu C.Lalrinchhana Dy.DPC RMSA.Lawngtlai District chuan Thutawi sawiin,Tawngtaina nen kal turte hi a thlah liam ani.

Officer thlah dawn

LADC Officers Association chuan vawiin chawhnu dar 1 hian Pi T.T.Thliahzing Dy.Secretary leh Pu M.C.Hrangtlunga Court President & Recorder te thlahna hun SSA, BRC Hall ah an hmang dawn.

Central Team lokal tum

An tum hmasak hun an sawn hnu in Zorinpui Land Custom Station hmun tur tlawh turin Central Team chuan march thla laihawl hian Lawngtlai District rawn tlawh an tum a, an rual hian Myanmar Team te pawh in ramri a insumdawntawnna hmun tur hi an tlawh ve bawk ang.

Charge hlan dawn

Vawiin hian Lawngtlai a Addl DC nilai Pu Vanlalngena chuan Addl. DC thar Pu Beila Khithie hnen ah charge a hlan dawn, tarlan tawh angin, Pu Vanlalngena hi Saiha ah Addl.DC hna chelh turin sawn a ni.

I&PO thar

LADC a I&PO thar Pi Masungi chuan a hna a chelh fel tawh a, hunremchang hmasaber ah Chanchinbumite nen inkawmhona buatsaih a tum

Sipai la dawn

Thla thar April ni 10 - 13 chhung khian Sipai chi hrang hrang lakna tura intlar chu Rajiv Gandhi Stadium bulah buatsaih leh a ni dawn a. Intlar tumte chu zing dar 6:00 ah mahni lehkha pawimawh kengin kenga intlarna hmun pan mai tur a ni e.

Zamzo Award Lunglei ah sem

Nimin chawhma dar 11:00 khan Lunglei DC’s Conference hall- ah Lunglei District a sawrkar pisa a meizuk khap kawnga tithate leh tichhia te puanna hun hman a ni a.Meizuk khap kawng a ti tha ber chu SP Office Lunglei niin CMO Office leh Govt. Leitlangpui HSS pahnihna niin DEO Office chu pathumna ah puan a ni. Heng result tha neitu hnenah hian ‘ZAMZO AWARD’ hlan an ni.

Sorkar a lungawilo tan website hawng dawn

Vawiin hian mipui in Sorkar a lungawilohna an thlen theih na tur website www.mipuiaw.nic.in chu Chief Minister Pu Lal Thanhawla’n Assembly Secretariat Conference Hall ah a hawng dawn a. Hemi hun rawn hmang tur hian Government of India atangin Shri. PK Jha, Joint Secretary, DARPG, Government of India leh Official dang 4 an rawn kal Mizoram sorkar a Deputy Secretary leh a aia sang zawng zawng te chu he hunah hian kal vek tur a beisei an ni. NGO leh MJA member te pawh he hun hi hmanpui tur a sawm an ni bawk

Tuesday, February 28, 2012

AH&Vety Department ten NLUP Second Instalment nimin khan an sem

Nimin khan Dokulha Hall ah, Lawngtlai Dist. AH&Vety Department te chuan Mizoram Sawrkar Flagship Programme NLUP a an Department hnuai a Trade thlangtu, Lawngtlai khawpui chhung leh a chhehvel khua a chhungkua 181 hnen ah NLUP First Phase, Second Instalment an sem. Pawisa sem hma a inkhawm tawite buatsaih District Vety Officer Dr.Thankima kaihhruai ah LADC a E/M, Vety enkawltu Pu Lalneihkhuma chuan Vety hnuai a NLUP Trade thlangtu te chu tihtakzet a, taimakna nen Pathian rawn chhung zel a an Trade thlan tipuitling tur a tan la sauh sauh tur in a chah a, hemi hnu hian NLUP dawngtur te hnen ah Lalneihkhuma hian a sem nghal. Nimin a NLUP semchhuah te hi, Arvulh thlangtu chhungkua 69 hnen ah `. 9500/- theuh, Vawk vulh thlang tu chhungkua 103 hnen ah `. 18016/- Zobawng vulh thlangtu chhungkua 5 hnen ah `. 42700/- leh Bawng lianchi vulh thlangtu chhungkua 4 hnen ah `. 6500/- theuh semchhuah a ni. Nimin a pawisa semchhuah zawng zawng hi a vaiin `.27,50,648/- niin, Vety hnuai a Trade thlangtu Bawngvulh thlangtu tih loh te chu Second Instalment a an dawn tur pekkim a ni tawh a, Bawng vulh thlangtute erawh chu Bawng la pek tur a ni thung a ni.

MDF leh MNF ten MADC, CCB Rules 2011 an hal

Nimin khan MDF & MNF Coordination Committee, Saiha chuan Saiha Bazar Traffic Point ah public meeting neiin nikum lamah MADC sorkar in CCB Rules an siam thar chu an pawmloh thu leh Autonomy himna tihbona tur leh State thuneihna hnuaia inbarhluhna ani tiin an duhloh zia lanlantir CCB rules 2011 an hal.Hemi hma a inkhawm neih chu Pu S.Vadyu Ex. MLA in a kaihruai a, Pu Zakhu Hlychho Ex-Minister in hunserh hmangin Pu M.Laikaw Chairman Coordination Commtt & Pre. MDF Hqrs. leh Pu HC.Lalmalsawma Zasai President MNF Dist. Hqrs. ten thu an sawi a, India danpuiin Hnam tenau zawkte himna turin Sixth Schedule Dan tha tak min siamsak a, he kan thuneihna leh kan autonomy himna tichhe zawnga CCB Rules siamthat a ni chu pawm theih a nilo a ni an ti a, High Court ah an khin mek thu an sawi a, High Court ah thiam loh an chang anih pawhin MADC a Coordination Sorkar a din chuan he dan hi siamthat nghal a nih tur thu an sawi bawk. Hemi hnu hian CCB Rules 2011 mizoram Gazette thar chu an pawmloh leh duhloh lantir nan an hal nghal a ni.

Zoram Ni

March 5, 1966-a India Sorkarin Jet Fighter hmanga Mizoram a bomb champha chu “ZORAM NI” tiin 2008 atang khan hman tan a ni a, kumin March Ni 5, 2012 (Thawhtanni) pawh hian ZORAM NI Organising Committee huaihawtna hnuaiah hman a ni leh dawn.

Mizo Nationa Day

MNF Party chuan kum 1966 March ni 1-a Mizoram tana , Independent a puan ni chu Mizo National Day-ah puangin kumin March ni 1 atang hian a hmang tan dawn a. Aizawl-ah chuan Mizo Hnam Run-ah hman a ni ang a, District hrang hrang khawpui-ah leh a remchanna hmun apiangah hman a ni bawk ang.

OFFICE OF THE CENTRAL YOUNG LAI ASSOCIATION C I R C U L A R

24th YLA General Conference in alo relthluk tawh angin ‘YLA danbu & Chhiatni - thatni inkaihhruaina’ chu ennawn (revise) a ni dawn a. Revision Committee pawh Central Executive Committee in a dinfel tawh a ni. Dan bu & Chhiatni - Thatni inkaihhruaina siamthat turah rawtna engpawh a hnuaia hming signed tu hnen ah 30th June 2012 ralhma in ziakin thehluh theih a ni ang. Rawtna engpawh siamrem leh thlitfim thu ah Constitution Revision Committee kut a ni ang. Dan bu hi 2012 Special Conference a pharh hman tur a nih avangin, huntiam chhunga rawtna lutlo te chu pawm a ni lovang. Sd/- Dr.Malsawmtluanga Fanchun Secretary Central Young Lai Association Lawngtlai

Monday, February 27, 2012

Lairam Gospel Centenary, nimin khan LIKBK Bazar Biak In ah hawn a ni

Nimin khan Lairam Gospel Centenary hawnna Lawngtlai Bazar a LIKBK Biak In ah neih niin, Upa Zahranga Zathang Chairman LIKBK Assembly in a hawng: Centenary hawnna hun hi Rev. E.F.Sangchem Chairman (Elect) LIKBK Assembly chuan kaihruaiin, Rev, Dr.LH Lalpekhlua Associate Gen.Secretary LIKBK chuan Centenary Introduction sawiin, Lairam chhung ah kum 1912 ah khan Mampui khua Khamchung Buk a an awm laiin, Kristianna lo lutin, mi pathum Kristian ah an inpe a, a hnu ah Mampui ah hian Lairam chhunga Biak In hmasa ber din a ni nghal a, heta tang hian Kristianna chu chhawmnun chhoh zel niin kumin 2012 hi a kim 100 na a lo ni ta a ni a ti. Centenary hawnna ah hian Rev, H.Lalsangliana AGS (Service) chuan Centenary thuchah a sawi. Laiream Gospel Centenary lawmna hi kum hlui atang khan kalpui tan ni tawh in December thla khan Lawngtlai atanga Sangau thlengin Centenary Rally Lirthei hmangin neih a lo ni tawh a ni,Gospel Centenary lawmna pui ber hi kumin Nov. Ni 24 atanga 27 chhung khian neih tur a ruahman niin, kumin chhung hian Gospel Centenary lawmna hi neih chhoh tur a ruahman niin, Sub Committee hrang hrang din niin, hmalakna an kalpui mek a ni. Centenary thupui atan ‘A thlawnin pechhuak rawh u’ tih hman a ni.

BCM hnuai a Social Concern Department buatsaihin Awareness Campaign neih a ni.

Ni hnih awh, Baptist Church of Mizoram hnuai a Social Concern Department buatsaih, Awareness programme chu Inrinni leh nimin Pathianni khan Lawngtlai Vengpui a Immanuel Biak In ah neih a ni. He Awareness Programme ah hian Social Concern Department, Lunglei Serkawn atanga mithiam lo kal ten Mipa leh Hmeichhiate Inlaichinna tha, Taksa thianghlim leh Hriselna, HIV/Aids chungchang te, Tunl;ai Mizoram Thlirna tihte leh Christian Councelling tih te chu he awarness ah hian kalkhawmte an zirtir a, sawihona hun huamzau taka neih a ni bawk. He Awareness Programme hi Lawngtlai khawpui chhung a BCM Kohhran 16 a Upa, Rawngbawltu leh Kohhran a Mawhphurhna nei te tan a buatsaih niin, tel an tha thawhkhat hle a ni.

January & February chhungin Thisen Unit 167 pek a ni tawh

Blood Bank Officer Dr.Lalrinfela hnen atanga thu kan dawn danin kumin 2012 chhungin Blood Donation Camp tum 5 neih a nih tawh a, thisen unit 167 a thlawn a dawn a nih tawh a ni . Baptist Church of Mizoram, TKP Lawngtlai North pastor bial khawmpuiin hmalakna tur a ruahman angin bial chhung a TKP Unit te chuan Lawngtlai District Hospital Blood Bank a dah turin thisen an pe mek a, Inrinni khan Thingkah khua a TKP Unit pahnih, Thingkah Unit leh Penial Unit te chuan Thingkah BCM Hall ah a thlawnin thisen Unit 15 an pe a, thisen petute hi mipa 13 leh hmeichhia 2 an ni, thisen pek te hi Blood Bank a thawk ten a hmun ah kalin an laksak a ni.

Centenary hawnna ah Minister

Pu Lalrinliana Sailo Minister chuan Zorinpui Land Custom Station tur a tlawh hnu ah Inrinni khan Lawngtlai a rawn thleng leh a, nimin Pathianni kha Lawngtlai ah hmangin, Lairam Gospel Centenary Hawnna inkhawm ah Minister hi a tel.

Farmers Training

ATMA Lawngtlai Dist. bultumin Sericulture Department chuan Lawngtlai Dist. a Sericulture Farmers mi 54 te chu Saiha ah Training nei turin tukin zing hian an chhuahpui dawn, Training zawh hian an zing a mi 26 te chu Exposer Visit neih pui nghal an tum a, heng Kuthnathawktute hi FLD Sanga Demonstrator leh ATMA hotuten an hruai ang.

Ramkang

Nimin chhun khan Christian Hospital thlang a kang a, mitlawmngai leh Fire Department ten kangmei in pawi liantham a khawih hma in an thelh, kangmei chhuahna hmun hi District Bawrhsap pawh in a thleng nghal. Hetihlai hian Saiha a ram kang chu nizan thleng khan thelh mih a la nilo.

NLUP Sem dawn

Vawiin hian Vety Department chuan NLUP Second Instalment vawiin hian a sem chhuak dawn a, he hun hi LADC a Executive Member Vety changtu Pu lalneihkhuman a hmanpui ang.NLUP semna inkhawm hi Dokulha Hall a neih tum a ni.

MMU Tuithlang ah

Health Department chuan Tuithlang lam ah Mobile Medical Unit hmang in mipui te hriselna an endik dawn, tunhnai a DC in helai bial a tlawh tum in mipuiten ngenna an siam a,hemi tihhlawhtlinna nan hian Department lam chuan ruahamanna an siam niin kan hria.

Tuesday, February 21, 2012

Pu.B.Lalhmingthanga D.C in District khawtlang lam tlawhin,tanpuingaite a tanpui

DC Pu B.Lalhmingthanga; chuan kar kalta Zirtawpni leh Inrinni khan Lawngtlai District khawthlang lam tlawhin Parva thleng a kal a, DC hian a tlawh khua ah te, pianphunga rualbanlo, mi harsa zualte leh mahni a In sa theilo mi chhumchhia zual te zawngchhuakin, sawrkar atanga tanpuina awm thei ang te a pe, DC chuan amah lo lawmtu mipuite hma ah thusawiin, Lawngtlai District a DC a a awm vangin, District chhunga mi te hriatchian a, an khua ah ngei tlawh a chu a tihtur a ngaih vanga tlawhchhuak a nih thu sawiin, mipuite chu sawrkar hmalakna theihtawpa tawiawm turin a chah. DC hian a tlawh khua a Sawrkar hmalakna hrang hrang te a tlawh a, khawtlang hruaituten harsatna an thlen te dawngsawngin, mipuite chuan, an tan DC dawr tur a Lawngtlai a kal a harsat hle lai a, an khua ah ngei an mamawhte DC hnen a an thlen thei chu lawmawm an tih thu an sawi. Pu B.Lalhmingthanga hian Indo Bangla Border Fencing hna thawhmek Chhipui bul mi pawh tlawhin, ramri hungna in khua a chhungkhung lo tur awm te chu ramri hung hna thawktute lo sawipui a tum thu leh, hmun thenkhat ah ramri hungna chu ramri atanga hla lutuk deuh ni a sawi pawh hnathawktute lo sawipui a tum thu a sawi.DC in a tlawh khua, a bikin Chakma Autonomous District Council huamchhung a chengte chuan kawngpui tha te, zirna leh hriselna lam a harsatna an tawh te, leh khawtlang in mamawh a neih hrang hrang te an lo thlen nasa a, DC chuan mipui ten harsatna an tawh chu a theih ang ang a sutkian a nih theih nan hmalak a tum thu sawiin, a bikin hriselna lam ah harsatna an neih te a ziaawm deuh nan Mobile Medical Unit hmanga a thlawn a an hriselna endik a nih theih nan Health Department lam lo sawipui a tum thu a hrilh. DC hi Addl.DC Pu Vanlalngena bak ah Lawngtlai, Bungtlang South leh Chawngte BDO ten an tawiawm.

BSI Lawngtlai Branch Annual Meeting neih a ni.

Nimin khan BCM Kohhran Centenary Hall.Lawngtlai Bazar ah Bible Society Of India Lawngtlai Branch Annual Meeting neih ani.BSI Annual Meeting hi Lawngtlai Branch President Upa Dr.R.Tintlunga Hnialum chuan a kaihruai a,Upa H.Sangmuana Secretary hnen atangin kum 2010-2011 report ngaihthlak niin .Upa F.Chungluaia,Finance Secretary hnen atangin Sum dinhmun report ngaihthlak niin,Branch Target Rs 214000 a khum niin,Rs 250000 anih thu ngaihthlak ani.Kum kalta 2010-2011 chhunga BSI Lawngtlai Branch dinhmun tlangpui hetiang hi ani.Patron member-112, Life member-619. Annual member-62. Junior member-98 awmin Memorial Gift mi 27 hnen atangin dawn ani a,Donation hi Mi 65 hnen atangin Rs 14996/- hmuh anih thu ngaihthlak ani bawk.meetingah hian Kum 2012-2013 chhunga Lawngtlai Branch hruaitu thar turte an thlang nghal bawk ani.

Central Team lo kal dawn

Central Team, Inter Ministerial Team te chuan tunkar Ningani khian Zochachhuah bul a Land Custom Station dinna tur Zorinpui Land Cuistom Station hmun tur tlawh an tum.

Thursday, February 16, 2012

Meikhu laka boruak thinghlim ber ah DC Office thlan a niin, 2nd Zamzo Award hlan a ni.

Nimin khan Lawngtlai District Anti-Tobacco Task Force huaihawtin Lawngtlai DC Conference Hall-ah 2nd Zamzo Award semna hun hman a ni a. He Award hi mipui vantlang hmun meikhu laka boruak thianghlim bera thlan Lawngtlai DC Office hnenah hlan a ni. Meikhu laka fai pahnihna na atan LADC (General Room) leh S.P Office te thlan an ni a, pathumna na chu DCSO Office, Lawngtlai in an dawng thung.Zamzo Award semna hunah hian Pu B. Lalhmingthanga, Lawngtlai DC leh District Anti-Tobacco Squad Chairman ni bawk chu Khuallian a ni a. Pu B.Lalhmingthanga chuan Mizote hi hman lai ata tawh vaihlo laka fihlim lo hnam kan ni a, cancer leh zial khu avanga natna chi hrang hrang kan tuar hnem phah tih sawiin tun hnaiah vaihlo laka fihlim kawngah kan harh thar nasa hle a ti a. Hemi kawnga Mizoram State Tobacco Control Society hmalakna chu a fakawm a tih sawiin Tobacco Free Mizoram siam turin tuna thangthar lo chhuak tur leh zirlaite an pawimawh a ni a ti bawk. COTPA Act kengkawh tura MSTCS leh Anti-Tobacco Squad te hmalakna tawiawm tura mipuite sawmin Zamzo Award hlutna vawn nun zel a pawimawh thu a sawi bawk.Zamzo Award hlanna hunah hian Dr. Lalrinfela'n "Effect of Tobacco on Health" tih thupui hmangin zirtirna hun a hmang a, Pu ZT Vawra Hmar, District Coordinator, South Mizoram, Tobacco Control chuan Air Quality Monitoring & Comliance Survey Report pein Zamzo Award dawng tur thlan an nih dan a sawi fiah a. He hunah hian Lawngtlaia Department hotute te leh Downtown English School zirlaite an tel a ni. Lawngtlai District-a Anti Tobacco Squad hian drive nei thinin mei zu an chawi pawisa Rs. 1830 an thehlut tawh a ni.

MPTA Gen.Conference CEM in a hmanpui

Ni hnih awh tur Mizoram Primary Teachers Association, District Hqrs. Lawngtlai General Conference vawi-5 na chu nimin khan Lawngtlai-III a YLA Hall ah tan a ni, Conference nikhatna hi LADC a Chief Executive Member Pu C.Ngunlianchunga chuan hmanpuiin Zirtirtute chu tu leh fa te mipuitling a chherchhuaktu pawimawh tak an nih vangin tih tak takna leh taimakna, ram hmangaihna thinlung pu chunga an hna an thawh a tul thu a sawi a, Lawngtlai District chu Ziak leh chhiar thiam tehna ah Mizoram a District ah a hniam ber a, Zirtirtuten tan an lak a tul hle a ni CEM chuan a ti. Nimin a MPTA Gen.Conference hun hmasa lam hi HC Thuamkunga President MPTA Dist.Hqrs. Lawngtlai chuan kaihruaiin chawhnu lam ah report hrang hrang ngaihthlak a nih bak ah an Member chatuanram pan tate sunna hun an hmang bawk, naktuk ah rorel leh hruaitu thar thlanna an nei ang. Vawiin MPTA Conference ah hian LADC a Executive Member, Primary Education changtu C.Lalneihkhuma pawhin thu a sawi bawk.

Ni 10 awhtur EDP Training DC in a hawng.

Nimin khan Pu B. Lalhmingthanga, DC chuan Prime Minister's Employment Generation Programme (PMEGP) hnuaia loan la tura thlan te puala Entreprenuer-ship Development Programme a hawng a. EDP Training hi Lawngtlai leh Saiha district chhung a PMEGP loan dawng turte puala buatsaih ni 10 chhung chhung awh tura duan niin Govt. Lawngtlai College Hall-ah neih a ni a. KVIC Mumbai sponsor niin MKVIB Lawngtla iin an huaihawt a, a hawnna hun hi Pu CL Sangchhawna, DVIO, Lawngtlaiin a kaihruai a, thu sawiin Pu B. Lalhmingthanga chuan PMEGP hi lehkha thiam hna nei lo te tana National Flagship Programme a nih avangin Sorkar in a ngai pawimawh tih a sawi a. Loan la tur reng reng chu EDP training-ah hian tha taka an tel a ngai a, PMEGP hnuaiah hian EDP training zo lo chuan margin money lak chhuah theih a ni lo va, Resource Person te pawhin theihtawp chhuahin an zirtir tur a ni a ti . Thalai te'n mahni inchawm theih leh mahni thawhchhuah ringa nun hi kan tum tur a ni a ti bawk.lawngtlai leh Saiha district puala EDP training ah hian mi 30 chuang telin, cheng nuai 2 hnuai lam dawng tur tan ni 3 leh cheng nuai 2 chung lam dawng tur tan ni 10 training buatsaih a ni dawn a ni.

Sangha khawitute Training

Nimin khan ATMA hnuaia Fish Farmer te tan MJA Press Club, Lawngtlaiah training buatsaih a ni a. Pu H. Vanlalthaliana, EM i/c Fisheries, LADC chu Khuallian niin Pu Lalzamlova Hmar, District Fisheries Development Officer, Lawngtlaiin he hun hi a kaihruai. mi 40 vel ten sangha khawi dan chungchanga Fisheries Department mithiam te zirtirna an dawng a ni. Pu H. Vanlalthaliana chuan sangha dil siam hi a vei thu leh eizawnna tlak a nih thu a sawi a. Traininga tel te chu theihtawp chhuah tur leh tualchhung thar chhuah sangha ngeia Mizoram chhung bazar te chawm tura tan la turin a fuih a ni.

Cong Unit inthlang

Nimin khan Chandmary Congress Unit chuan hruaitu thlan tharna hun an hmang a, chuhtu awmlo vin O.B pathum te chu tling ah puan an nih thu kan dawng, hruaitu thar te chu President K.Lalawmpuia Vice President J.Lalduhsaka Treasurer Lianuka te an ni.

LADC Officer ten tanpui

LADC Officers Association chuan Saiha a kang tuar te tanpui nan nimin khan Rs.20000/- an hlan, heng pawisa te hi President Pu H.Lalruatkima leh Treasurer Pu C.Lalmuanvela ten Saiha ah an hlan.

KMMTP Consultation

Vawiin hian LSA Gen.Hqrs.Lawngtlai leh Zo Indeginenious Forum tangkawp te buatsaih in SSA, BRC Hall ah Kaladan Multi Modal Transport Project chungchang ah Stakeholhers Consultation neih a ni dawn, he hun hi LADC a CEM Pu C. Ngunlianchunga’n khuallian niin a hmanpui ang, he hun ah hian Myanmar pawh tur a lawngtlai atanga kawngpui laih mek chungchang ah inrawnkhawmna pawimawh tak neih a ni dawn a, Pu A. Lalngailova Executive Member, Social Welfare chu khualzahawm a ni ang.

Wednesday, February 15, 2012

Kumdang aia uar in Valentines Day Lawngtlai ah hman a ni. Midangte tan thisen Unit 65 pek a ni.

Nimin Valentines Day chu kumdang ai a uarin Lawngtlai ah hman a ni a Valentines Day ah hian Hmangaih leh hmangaihte inkar a duhsakna lantirin, thilpek chi hrang hrang an inhlantawn a, a bikin thalai lam ten an hmang uar zual a, hetihrual hian Nu leh Pa leh kum upa tawh lam te pawh in an kawppui te hnen a thilpek chu an intihhmuh chhoh mek niin a hriat. Nimin khan Valentines Day Gift zawrhna dawr te chu an lun hle a, zingkar atangin tlailam thleng khan Valentines Day thilpek tur lei an thahnem hle a ni. Hetiang hun ah hian zirlai naupangte pawhin an duhsak zawngte thilpek hlan chu an intihhmuh in, Zirlai naupang, Valentines Gift zawrhna ah hmuhtur an thahnem hle a ni. Valentines Day pual hian Association for Voluntary Blood Donation Lawngtlai leh Facebook a Group pakhat Lawngtlai Future Group tangkawp te chuan Lawngtlai Bazar a JH Lorrain Hall ah Blood for yours Valentines tih Programme hmangin thalaiten a mamawh apiangte hmanturin an thisen an pe a, hetiang Programme hi kum kalta lam ah pawh buatsaih a lo ni tawh a, kumin hian thalai ten he Programme hi an hlut hle in a hriat a, thisenpe pawh an thahnem hle. Nimin a Valentines Day denchhen a midangte tan a thisen pe te hi Mipa 55 leh Hmeichhia 10 an vaiin 65 niin, Dr.Lalrinfela Blood Bank Officer District Hospital Lawngtlai leh a thawhpuiten JH Lorrain Hall ah thisen hi an laksak a ni.Hetiang a uar taka a Valentines Day hman a nihna chhan pakhat chu mithahnem ngai ten Facebook lam ah nasa taka hma an lak vang ni a a rinawm thu kan dawng.

Chapcharkut/Hlukhla March Ni 2 ah hman a ni dawn

Nimin chawhnu khan Lawngtlaia Chapchar Kut 2012 hman dan tur relin DC’s Conference Hall-ah Organizing Committee , Pu Vanlalngena, Addl. DC, Lawngtlai kaihruaiin an thukhawm a, .Chapchar Kut 2012 Organizing Committee chuan Lai hnam kut Hlukhla nen hman rual theiha ngaiin Lawngtlaiah Chapchar Kut hman ve tha an ti a, cultural item chi hrang hrang pholanna hunah hman nise an ti a. Chapchar Kut hi March 2, 2012 ah CYLA Playground-a hman tur niin Kut Thlengtu atan DC, Lawngtlai ni se, Kut Pa atan CEM, LADC ni se tiin an rel. Chapchar Kut Miss thlan tur niin a buaipuitu atan MJA leh LWA te ruat an ni a, Kut hmannaa tel naupang, hnam incheia inchei te chu lawmman siamsak tum a ni bawk. He hunah hian CYLA chu mawhphurhna lian ber la tura ruat a ni a, Kut hlawhtling taka hman a nih theihnan hma lak nghal a ni a, Committee hi February 17, 2012 (Zirtawp ni) hian an thukhawm leh ang.

Dr. Bob Pierce Memorial Football Tournament khelh tan a ni

Nimin Feb 14 khan Dr. Bob Pierce Memorial Football Tournament chu Central YLA Playground ah hawn ani. Lawngtlai District Football Association leh World Vision India Chhimtuipui ADP te tangkawpin an buatsaih Dr.Bob Pierce Memorial Football Tournament hi a tum thumna niin,Tournament hlawhtling tak tak buatsaih alo ni tawh a.Kumina Tournament hawnna hi Pu T.Lallianchama Sr.Vice President.LDFA in a kaihruai a,Rev.Zionvarmawia chuan Pathian hnena inhlanna hun hmangin Pu Meren Nampui,Project Manager,World Vision India,CADP chuan hawnna thu sawiin Kum 1947-ah World Vision hi Dr.Bob Pierce an mirethei naupang a chharchhuah atanga a din anih thu sawiin,Christian pawl lian tak anih thu a sawi a,tun dinhmunah khawvel ram 150 ah hna an thawh mek thu a sawi.World Vision thiltum ber pakhat chu Thalaite Talent haichhuahsak anih thu sawiin,Pu Meren Nampui chuan Thalai Talent nei tha te chu World Vision senso in hmun dangah zirtir an nih thin thu a sawi a,Thalaite chuan Tumruhna kan neih a pawimawh hle a,tum ruhna kan neih loh chuan Chhungkua,Khawtlang leh Ram ah kan hlawhtling ngai lovang ati. He Football Tournament ah hian Team 16 an tel a,Lawngtlai khawchhung bakah khawchhehvel amite pawh an tel nual bawk.Kumina lotel hla ber chu Bungtlang 'S' an ni.

Pawngsual duh loh vangin Sangau ah kawng an zawh

Nimin khan Sangau ah LWA buatsaih in pawngsual duh loh vangin kawng zawh huaihawt a ni a, kawng zawh a tel an thahnem hle hetiang a kawngzawh huaihawt a nihna chhan hi thudawnna in a sawi danin Dt.10.2.2012 a Sentetfiang Nula kum 19 mi chu pawngsual ngei ni ahriat anih avang niin Pawngsual tawk ni a insawi Nula kum 19 mi hian asawi danin Ni 10.2.2012 khan a Pu (A nu pa) Farnu Fa Sentefiang chuan Lui kal puiah a sawm a, chhungkhat hnai an nih avangin leh ngamtlaktaka Pa anga a enthin anih avangin a zui ve mai a, tichuan lung hmunah a kalpui pa chuan a pawngsual ta niin a sawi. Pawngsualtu a puh hi Nupui nei lai niin Fa pawh pahnih a nei tawh.Pawngsualtu a puh hi Sangau Police la in hmunpui lam ah an thawnfel tawh a, pawngsualtu a puh hian he nula nen hian inngaizawngin tun tum hi avawikhatna mai anih loh thu a sawi thung. Hetih lai hian Pawnngsual (Victims) hian aduhlo chunga tharum hmanga pawngsual anih zia sawiin he nula hi a hnung zangte pawh a belkang nual niin thulakna chuan a tarlang tel.

Gas chungchanga Sorkar thuchhuah

FCS&CA Department chuan gas harsat na chungchang ah thuchhuah siamin,Tun laiin Mizoram in LPG ah harsatna kan tawh mek a. Mizoram in thla khata Gas kan mamawh tawk vel a ngaih 112676 cylinders hi Mualkhang Bottling Plant leh Silchar Bottling Plant atanga hmuh thin a ni a, October 2011 atang khan Mualkhang leh Silchar Bottling plant chawmtu Guwahati Refinery ah Technical Problem ni 17.10.2011 atanga November 2011 thleng an neih avangin leh Bongaigaon Refinery ah Technical Problem ni 1.10.2011 atanga 14.10.2011 thleng an neih avangin Mizoram a Gas supply a tlem phah tan ta a.Kan harsatna te sutkian tumin IOC lam pawhin hma an la mek a Silchar Bottling Plant atangin Gas tam zawk supply tum mek a ni, Mualkhang Bottling Plant ah pawh an hna thawh hun te pawh sei sakin holiday ah pawh hna thawhtir mek a ni.Feb ni 10 atanga Gas supply tha tawk tura beisei a nih laiin Bottling Plant ten bulk supply an hmuh that theih loh avangin Mizorama rawn thawn luh tur pawh beisei angin a tam thei lova. New Delhi leh Guwahati lama IOC hotute pawh Gas supply tichak tura ngen reng an ni chungin beisei ang chu a la ni thei lo a ni. Hun reilote hnunah chuan a that beisei a ni.

Tuesday, February 14, 2012

Bharat Nirman Campaign ah thil fello haichhhuahte MJA ten bawhzui an tum

Kar kalta Feb. Ni 7 atanga Ni 10 chhung khan Sawrkar laipui hmalakna chungchang in hrilhhriatna leh mipui ten hriatduh an neihte inhrilhfiahna hun, Central Media hrang hrang leh Mizoram sawrkar Information Department leh MJA tangkawp te buatsaih Bharat Nirman, Public Informatrion Campaign chu Lawngtlai District khawhchak lam Sangau tlangdung a khua pathum, Sangau, Siachangkawn leh Bualpui ‘NG’ ah te neih a ni a, he Campaign ah hian sawrkar hmalakna a mipui ten an hriatduh an zawhna ah thilfello hriatchhuah a awm nual a, hemi chungchang hi nimin khan MJA Lawngtlai District Executive Meeting ah sawi niin, a tul anga hmalak zui nise an ti. Thilfello langsar zing ah thigntlang a chengte eng pekna tur RGGVY atanga hnathawh chu Nirman Campaign ah hian sawi hlawh zual a niin, he hna thawk tur hian Contractor thlan a ni a, VC ten completion Report an ziaksak loh chuan an hna chu zofel anga ngaihtheih an ni lova, khaw thenkhat, hna an la thawhzawh siloh, hna zofel tawh anga report awm si khua te awm nual a, hetiang deuh tho hian SSA hmalakna hnuai ah School thlanbik te chu Electric wiring vek tawh anga tarlan, a tak hmuhtur awm silo te sawilan niin, hemichungchang ah hian SSA hotute chuan an hriatpui loh thu leh Contractor hmang a hna thawh a nih thu an sawi a, heng chungchang bak ah hian thilfello dang tarlan awmte pawh MJA Lawngtlai District chuan a tul anga hmalakzui nise tiin an rel ta a ni.

SSA Lehkhabu sem dan SPO in a sawifiah

State Project Office, Mizoram SSA Mission chuan hetiang hian thuchhuah a siam.News Paper hrang hranga lo lang Synod Home Mission School, Chawnpui Veng, Tlabung in zirlaite hnena Free Text Book pek tih chungchang a thil awm dan chu hetiang hi a ni.SSA hnuaiah hian Kum tinin Naupangte a thlawnin Zirlaibu pek thin an ni a. Zirlai naupang pakhat tan Primary ah Rs. 150/- Middle ah Rs. 250/- Central atangin dawn thin a ni. Mizo Midium Zirlaibu te chu a man a tlawm deuh avangin a bu kimin a pek theih thin a, Sorkar Sikul English Medium ah te erawh chuan zirlaibu man hi a san deuh thin avangin, a bu kimim pek theih a ni ve lova, chuvang chuan Synod Home Mission School, Chawnpui Veng, Tlabung, Lunglei District Zirtirtute’n a an tih ang bawk hian Sorkar Sikul English Medium dangah pawh Zirlaite remchan zawk nan SSA in a pek theih bak zawng chu a hlawm a leiin Zirlaite hnen-ah an hralh thin a ni.

Officer siksawi

Lawngtlai a Addl.DC Pu Vanlalngena chu Saiha a Addl.DC a awm tur a sawn a ni a, Pu Beila Khithie chu Addl.DC Lawngtlai hna chelh tur a tih a ni.

Niawhtlang mi 3 tui ah tlahlum

Myanmar ram Bilhar(?) khua a khawmpui chhim a kal Niawhtlang mi pathum te chu nimin khan an khua an panna ah tui ah an tlahlum, tui a tla hlum te hi kum 35 mi Lalrinsanga leh Kum 25 Jonathana leh a nupui Duhpari te niin, nizan khan an ruang hi an khua thlenpui a ni.

Lai Hla Tlangzarh

Nimin khan Lai Hla Collection album Ka Hla duhbik mi, Vol-I chu SSA BRC Hall ah Pu C. Ngunlianchunga, CEM in a tlangzarh He album ah hian zaithiam 11 te zai ngaihthlak tur a awm.

LDDVF Chawngte ah

Vawiin hian LDDVF hruaitute chuan CADC a hmasawnna hna thawhte en tur in Chawngte an pan dawn.

Chapcharkut Meeting

Vawiin chawhnu dar 1 hian DC’s Conference Hall ah kumin a Chapchar Kut hmandan tur ngaihtuah turin Meeting neih a ni dawn.

Friday, February 3, 2012

Saiha Bazar a kangmei chhuak ah In 32, chhungkua 57 luahlai a kangral vek

Nizan hmasa dar 10:00 vel khan Saiha Main Market bul atangin kangmei rapthlak tak chhuakah In 32, chhungkaw 57 luahlai lai chu a kangfai vek a, Indang 15 chu a kankai loh thiah a ni. Kangmei chhuakah hian Dawr bungrua tam tak a kangral a, Vawk sum 6 pahnih a kang bawk. Nunna chan an awm lova, hliam pahnih awmin Damdawiinah enkawl an ni. Saiha D.C Pu Kunal chuan kangmei chhuahna hmun hi panin chhawmdawlna leh tanpui dan turte a ngaihtuahpui a, Tlawmngai Pawl hrang hrang ten he chhiat tawhna hmun hi an vil reng a ni. Official ten Kangmei chhuahna hmun hi nimin khan a hmunah tlawhin In thar sak sak dan tur ngaihtuahin a hmun an enfiah nimin tlai dar 2:00pm khan DC Conf. Hall ah Emergency meeting Saiha DC hovin an thukhawm a, Head of offices, NGOs, leh chanchinbumite telin Saiha DC chuan heng kangmei tuar te tan hian Rs. 10000/- theuh pek an nih tur thu sawiin Silpoulin, leh Blanket 100 ve ve an dah tawh thu sawiin Dept. staff zawng zawng te nikhat hlawh theuh thawh turin a ngen a, hei hi commmittee pawhin an pawmpui nghal bawk.Pu FC.Zase Chairman MADC aiawh Pc. FC.Zase chuan MADC hmalakna sawiin mi 57 te hnenah Rs. 10000/- theuh pek an nih tur thu leh in sakna tur Rangva leh tul dangte pawh ngaihtuahpui an tum thu sawiin Hnatlang thawkte thingpui inna tur Rs. 10000/- pek anih tur thu a sawi bawk In thar sakna tur leh chhawmdawlna atul anga tanpuina thawka buaipui turin Task Forces commtt. Addl.DC Saiha Pu N.Chakhai Chairman na hnuaiah dinin member 11 ruat nghal an ni.He chhiat tawh chungchangah Governor pawhin a tawrhpui thu sawiin Rs. 78000/- kangtuar te tanpuina a rawn pek thu tarlan a ni bawk a,nimin tlai khan Minister, Pu S.Hiato Pu Zodintluanga Minister leh Pu Nihar Kanti Chakma ten Saiha an pan nghal, Saiha atanga thudawn danin kangmei tichhuak tu a puh Vanlalkila S/O Zahlira chu Police ten an kawl mek a ni.

Governor lokal dawn

February Ni 13 khian Mizoram Governor chuan Lawngtlai a rawn tlawh dawn a, mipui hma a thu a sawi bak ah chhunchaw a fak bawk ang. Governor hian hemi Ni hian Lunglei,Chawngte leh Saiha te pawh tlawh nghal a tum.

Tanpuina lakhawmmek

Saiha a kangmei tuarte tanpuina tur chu Mizoram hmun hrang hrang ah tlawmngaipawl ten an khawn mek a, Central YLA pawh in nimin atang khan chhawmdawlna tur hi a lakhawm nghal a, Sangau Block Youth Organisation leh Chhawkhlei Times Chanchinbu tangkawp pawhin an Block huamchhung khawtin ah Bawm siamin tanpuina lakkhawm nise an ti a, Central YMA pawh in chhawmdawlna thawhdan tur ah ruahmanna a siamfel nghal bawk.Pawl leh mimal thahnemtak ten Kang tuarte tanpuina an pe lut mek.

NLUP in Model Code of Conduct kalh lo.

State Election Commission thu chhuah siamin a tarlan angin February 23-a Village Council/Local Council inthlan lo awm tur atana Model Code of Conduct puan chuan NLUP hnuaia hna kal lai mek thawh chhunzawm a khap lova; District thuneitute hnena sum pek chhuah tawh ruahmanna awm sa kalpui pawh a huam lo va ni. Hnathawh na tur sum leh hmanraw sem chhuah phal a nih rualin programme ropui tak nena rik bung bung erawh phal a ni lo va. Model Code of Conduct hnuaiah hian NLUP dawng tur thlan thar phal a ni tawh lo va. Politics-a ham that nan tumahin an hman loh nan inthlan hma kar khat chhung chu NLUP hi chawlhsan rih tur a ni.

MJA President in DMZP lehkhabu a tlangzarh

Delhi MZPl lehkhabu buatsaih ‘8th Schedule-a Mizo tawng dahluh zirchianna Bu’ chu nimin khan Aizawl press Club-ah MJA President Pu H Zosangliana’n a tlangzarh. Tlangzarhna inkhawmhi MAL President Pu Lalthangfala Sailo-in a kaihruai a, MAL Secretary Prof. Laltluangliana Khiangte-in lehkhabu bihchianna hun a hmang.

DISTRICT MAGISTRATE ORDER

IN THE COURT OF DISTRICT MAGISTRATE LAWNGTLAI DISTRICT:LAWNGTLAI (JUDICIAL BRANCH) O R D E R Dated Lawngtlai, the 31st January, 2012 NO.J.11013/2/2009-DC(LTI)/: Mizoram khaw tam zawkah Buh leh thlai chin nan Ramngaw tha thing leh mau leh hnimte vat faiin Lo atan kan hal thin a. Hei hi hnam changkang lo berte chindan kan la bansan theih loh chu a ni. Kan eizawnna atan a loh theih loh a kan la neih reng, Lovah leh hal hi a thlakna tha zawk kan neih hma chuan kan la ti chhunzawmzel dawn niin a lang. Kan fimkhur tawk loh vang leh mei kawng tha taka kan siam thin loh avangin kan mamawh bak ram nasa takin kan tikang thin a, Mei kawng sial loh bak ah kan duh hunah Lo hal hun bithliah awm lovin thal khawro lutuk hnu ah te Lo kan hal thin hian ram nasa takin a tikang thin a ni. Kan Sawrkar in ram kang thin pawizia hriain Fire Prevention Committee a din a, Lo hal hun bithliah te a siam a, Lo hal hma a mei kawng tha taka siam turin mipui hriattirna a chhuah bawk a. Ram kang ven nan Lo hal hma a mei kawng tha taka sial tur leh sorkar in Lo hal hun bituk a siam tha taka zawm a nih theih nan leh ram tikang lo tura khapna thupek chhuah hi thil tultak, tihmakmawhah ka ngai a. Chuvangin, KEI,B.LALHMINGTHANGA, MCS, DISTRICT MAGISTRATE, LAWNGTLAI DISTRICT,LAWNGTLAI hian Section 144, Cr.Pc.in thuneihna minpek hmangin a hnuaia thupek te hi ka chhuah e. 1) 15th March 2012 hmain Lo hal vek tur a ni. 2) Lo hal hmain mei kawng tha taka siam vek tur a ni. Mei kawng siam lo chuan Lo hal loh tur a ni. 3) Mi tumahin ram tihkan loh tur a ni.Village Council te hriattir lovin mahni duhthu a Lo hal mai loh tur. Village Council tinin an ram chhung a kan loh nan uluk takin an tlangau tir tur a ni. 4) He thupek zawm lote chu Section 188 IPC hmangin hrem a ni ang. He thupek hian chhuah a nih atangin thlahnih (2) chhung a huam ang. He khapna thupek hi Court Seal a chhut hnanin vawiin 31.1.2012 hian ka hming ka ziah hnan e. Sd/- B.Lalhmingthanga District Magistrate Lawngtlai District, Lawngtlai

Thursday, February 2, 2012

Lawngtlai ah CPGRAMS Training BNRGSK Conference Hall ah nimin khan neih a ni

Nimin khan Lawngtlai BDO Office bul a BNRGSK Building Conference Hall ah NIC leh Dept. of ICT, Govt. of Mizoram buatsaih Centralised Public Grievances Redressal and Monitoring System (CPGRAMS) Training neih a ni a. Department hotute leh computer operator te kal khawmin mipui te harsatna thlen chinfel dantur an zir ho . Training hi Lawngtlai District Informatics Officer Pu James Vanlalfakawma'n a kaihruai a, Pu Lalramnghaka Ralte, ICT Aizawl leh Pu Lallawmkima NIC Aizawl ten zirtirna hun an hmang a ni.CPGRAMS hi India ram state 3 ah hman tawh niin Mizoram hian 4-na nih tumin hma a la mek a. Public Grievance Redressal atan hian website http://mipuiaw.nic.in chu siam mek a ni a, February thla chhung hian mipui hman theiha chhawp chhuah hman tum a ni. Training ah hian CPGRAMS software hman dan ngaihthlaka thlir ho a nih bakah zawhna leh chhanna hun te hman a ni bawk.

R-Day Review Meeting DC ho in neih a ni.

Nimin chawhnu dar 1 ah khan Lawngtlai DC Office Chamber-ah lawngtlai-a Republic day 2012 lawmna thlirletna hun hman a ni a. He hun hi Lawngtlai DC Pu B. Lalhmingthanga'n kaihruaiin Lawngtlaia sorkar department hrang hrang hotute leh NGO hruaitute an kal tha hle a ni.DC Pu Hmingtea chuan tanrual chuan thil ropui tak pawh tih theih a ni tih sawiin hlawhtling taka Republic day lawmna atana sum leh tha sengtute chungah lawmthu a sawi a. Hun chep tak kara Tableau Show buatsaihtute a fak bakah chanchinthar a puanzar hna thawktute chungah lawmthu a sawi a ni.

WORLD WETLANDS DAY

1971 a Iran rama khawpui pakhat Ramsar -a khawvel ram hrang hrang palai ten intawhkhawmna (convention) an neih tumin khawmuala dil, tuikhuah leh lui tui thianghlim te humhalh turin thuthlung an siam a. He ni hriatreng nan February ni 2 hi khawvel pumpuiah “World Wetlands Day”-ah puan a ni. Khawvela tui awm te hi tuia cheng chi nungcha chi hrang hrang te chenna leh inhnangfakna, thil to chi tinrengte intunnunna anih bakah mihring te tan pawh damkhawchhuahna atan a pawimawh em em a . Mi thiamten an sawi danin kan chenna lei hmun zaa thena hmun sawmsarih pakhat (71%) hi tuiin a khuh a; amaherawhchu tuifinriat leh tuipui tui al (saline water) chu mihringte ei leh in tlak anih loh avangin chung tui zinga 3% emaw chauh chu mihring te tana ei leh in tlak a nih avangin a humhalh kawngah tan lak a tul hle a ni. Heng khawmuala tui awm te hi a bul hnaivaia cheng mihring te nen hmasang atanga fel leh tha taka lo inkungkaih tawh thin an ni a, mipui khawsak relbawl (economic activity) kawngah pawh tui tel lo chuan engmah a tih theih tak tak loh a ni. Chuvangin, tui hi a langah pawh lang lo ah pawh a tangkai hle. Khawmuala tui awm te hi tui thianghlim petu anih bakah lei hnuaia tuihna siamtu a ni a, chung tuihna te chu thilnung hrang hrang te khuanu ruat anga inbuktawk (ecological balance) in a awmtir thei chauh a ni. Ruahsur tam avanga tui luang liam tur tam tak hi dil leh tuikhuah te hian a dawng khawl a, chu chuan tuilian tur a tihziaawm thin avangin leilung luanral tur nasa takin a veng bawk. Khawmuala tui awmna bul vela thing leh mau, thil to tinreng te hian leimin tur a veng nasa hle. Tuifinriat tuifawnin leilung a eihek tur a veng a, thlipui tha chakna nasa takin a tiziaawm thin a ni. Khawmuala tui awm hi a bul vela cheng mihring te hnamzia nen thuk takin a inkungkaih tlat thin. Tui bawlhhlawh lo dawng khawlin a tihthianghlimna tura sawngbawlnaah a tangkai hle. Khaw lum leh vawh dan a tiziaawmin, a awmna bul vel sik leh sa chungchangah nasa takin kawngro a su a ni. Ramsa tuia cheng chi te, tui leh khawmuala cheng chi te tan an chenna siamsaktu a ni a, ecosystem derthawng leh tihchhiat awl tak vawng nungtu tha tak a ni. Mipui vantlang khawsak relbawl nana thil pawimawh hrang hrang - tui in tur te, sangha khawina atan te, tuahthing lakna atan te, nungcha humhalh nan te, zin veivah nan te, inchawhharh leh intihhlim nan te leh khualzin mite hipna atan pawh a tangkai em em a ni. source:diprmizoram

Tourism Dept in kum 25 chhungin Vbc.99.33 chhunglut

Kum 25 chhungin Tourism Department chuan Mizoram sorkar hnenah cheng vbc 99.33 an chhunglut tawh.Tourism department chuan an dintirh atangin tourism hmasawnna atan centrally Sponsored Scheme (CSS) atangin cheng vbc 135.64 an dawng tawh a, heng sum leh state plan suma an sak hmang -in tourist lodge 38 an enkawl mek bawk.Hetihlai hian Mizoram hmun hrang hranga Tourism department enkawl Tourist Lodge te chu mimal kuta hlan tumna a awm ni a sawi a ni a, hemi chungchangah hian Tourism Secretary, B Sairengpuii chuan, mimal kuta hlan tum chu thuphung mai a nih thu a sawi a. Lodge hrang hrang enkawl hna mimal kuta hlan turin tihtur tul tamtak awm te tih a la nih loh avangin, hei hi tunhnaia tih nghal mai theih a ni lo niin a sawi.

MCS Result chhuak

MPSC chuan nimin khan MCS Jr.Grade Written Exam Result a tichhuak a, mi 882 Exam atangin Post 10 ruak ah mi 20 ten he Exam hi an paltlang. Chhimlam atangin Rochuangkimi Khenglawt, Pu Nelson Khenglawt New Saiha fanu leh B.Laldingheta, B. Zonghinga Farm Veng Lunglei fapa te an tel.

Wednesday, February 1, 2012

Sangau leh Bungtlang Block a a thlawn a Zirlaibu semtur Pu V.Zirsanga’n a vailiam

Kum danga an lo tih thin angin,SSA Mission.Lawngtlai District chuan nimin zing dar 7:30 khan Elementary School zirlaibu a thlawna semchhuahna District Project Co Ordinator Office kawtah an hmang.Hemi puala inkhawm tawi neih chu Pu L.Z Tluanga DPC.SSA.Lawngtlai District chuan a kaihruai a.Khuallian Pu V.Zirsanga,Executive Member i/c Education(Middle School) chuan,India Sorkar ropui takin SSA Mission kaltlanga Zirlaibu a thlawna asem thin chu a ropui takzet a,sorkar laipuiin a beisei ang taka a bo abang awm lova, naupang kum 6-14 inkar zawng zawng ten sikul an luh atul ani tiin chutiang ti hlawhtling tur chuan SSA Mission Lawngtlai District chuan theihtawp chhuahin a bei ani ati.Pu LZ.Tluanga DPC chuan lehkhabu an semchhuah dan sawiin.Primary School 146 ah Naupang 12230 tan leh Middle School 76 ah naupang 6770 tan avaiin zirlaibu 111'751 semchhuahtur anih thu sawiin heng zirlaibu semchhuah tur te hi Sangau Block leh Bungtlang'S' Block bakah Cluster(CRC) hrang hrangahte sem tur anih thu a sawi.Pu LZ.Tluanga chuan duh aia zirlaibu an hmuh kim tlai avanga an semchhuah hma theih loh thu sawiin,school tan hma erawh chuan school thlen kim tir vek tum anih thu a sawi bawk.Heng lehkhabu semchhuah turte hi Pu V.Zirsanga Executive Member chuan Flag vaiin a thlahliam ani.LADC Sawrkar hnuaia Zirna In ah te naktuk Feb. Ni 2 atang hian School hawn tan a ni dawn.

RMSA buatsaihin Zirtirtute pualin Traning neih a ni

Nimin khan Lawngtlai a SSA, BRC Hall ah RMSA Lawngtlai District buatsaihin, In- Service Teachers Training neih a ni a, Pu C.Lalrinchhana Dy.DPC, RMSA Lawngtlai in kaihruaiin, Pu Lalduna Chinzah DPC chuan he Training hi hawngin RMSA chu tha taka kalpui a nih theih nan ruahmanna neih that a ngai a, zirtirtute chu ruahmanna tha neih a nih theih nan an pawimawh em em a, an Training chhungin theihtawp chhuah a hlawhtling taka Training an zawh theih nan tan la turin a chah. Pi Ngurhmingliani Principal, DIET / District Resource Centre Lawngtlai pawhin Zirtirtute fuihna thu sawiin, Zirtirtute chu ram hmel lanna an nih vangin kawng engkim ah an fimkhur a tul thu a sawi. Training hi kumtin neih thin niin, kumin ah pawh hian kumbul tan nan Secondary School Zirtirtute intuaithar lehnan Training hi RMSA Lawngtlai chuan a buatsaih a ni. He Training ah hian DIET Lawngtlai atang leh DIET Lunglei a mithiam ten zirtirna an pe a ni.

MGNREGA a pawisa hmuh tawh Vbc.311.95

Mizoram chuan MGNREGA hnuai ah 2011-2012 chhunga a hman turin Central sorkar chuan January, 2012 chhung hian District 8 tan Rs. 126.84 crores a rawn pechhuak leh a. Kum 2011-2012 chhunga MGNREGA hnuaia Central sorkar atanga State sorkar in a sum dawn tawh zawng zawng chu Rs. 311.95 crores niin hemi do let nan hian State sorkar chuan Rs. 24.11 crores District 8 (pariat) hnenah a pe chhuak ve bawk a ni. Central sorkar atanga sum dawn leh State sorkar in a pekchhuah belhkhawm hi Rs. 336.06 crores a ni. Kumin 2011-2012 hian kum dang zawng aiin hmuh a tam a, inhlawhna tam zawk Job Card neitute hnenah pek theih beisei a ni.

Training zo dawn

Ni thum awh tur Training on Basic Functional Course for Elected Representatives and Functionaries neih mek chu vawiin ah zawhfel a ni ang.Training hi SIRD bultum buatsaihniin, Lawngtlai Press Club ah neih mek a ni a,Gram Saba, Social Audit, National Social Assistance Programme leh Right to Information(RTI) chungchangte zirho a ni a, Zirtirna hi Pu B.Rorelliana District Capacity Co-Ordinator Lawngtlai District chuan a pe thin a ni.I&PRO, CDPO leh DCSO atang te pawhin Zirtirna pek a ni bawk He Training hi Lawngtl;ai Town Village Council member te tan a buatsaih ni a, tel an tha thawhkhat viau in a hriat.

MJA ten DC Pu Hmingtea an dawr

Nimin khan MJA Lawngtlai District hruaitute chuan DC Pu Hmingtea chu MJA hmalakna leh mamawh an neih te sawipuiin an dawr a, DC hian MJA hruaitute chu tha taka lo dawngsawngin, Press Club, Conference Hall cheithat tul chungchang MJA ten an thlen chu Engineer te lo enchian tir a, a theih anga cheithat a nih theih dan tur lo ngaihtuah a tum thu a sawi a, MJA hruaitute hi Deputy Commissioner Pu Hmingtea’n a lo dawnsawn dan ah an lawm hle.