Seminar on Rights of Persons with Disability Act, 1994’ neih a ni

Nimin khan Aizawl Press Club-ah chanchinbumite pualin ‘Seminar on Rights of Persons with Disability Act, 1994’ neih a ni a. Rualbanlo (Vohbik) te chanvo hrang hrang neihte sawihona hun hman a ni a. Pianphunga rualbanlo ten anmahni chanchin ngaihnawm takin an sawi bawk. Rualbanlo (Vohbik) te puala inkhawm hi MJA president Pu H. Zosangliana chuan kaihruaiin, tunhma a kan pi leh pu ten rualbanlote ngaihsak nachang an hriat loh chu tunlai khawvelah chuan ngaihsak an hlawh tain, an dikna chanvo (Rights) pawh kan zah sak tial tuial hi a lawmawm hle a ti. Pi Sangzuali Vangchhawng, SCERT Special Educator chuan Vohbikte humhalhna dan hrang hrangte tarlangin, India Danpui hnuaiah anmahni thawh theih awm tawk a thawk ngei tura chhan hrang hrang avanga rualbanloten sorkar hna lakah 3% an neih thu a sawi a. Chumi rual chuan central sorkar chuan thuneihna sang tak nei- Coordination Committee dinin anni hian rualbanlo te hamthatna leh an chanvo chan theih tur awm ang angte state sorkar-ah a hriattir a ti.rualbanlote (Person with Disability) chungchangah Conmmissioner awm tur a awm loh avanga rualbanloten harsatna an tawh dan hrang hrang a tarlang bawk. Rualbanlote hi medical doctor ten enin 40% chin rualbanlova pawmin 80% chu a nasa zual an ni a ti bawk. Rualbanlote hamthatna leh dikna an neih atanga duhsakna an dawn theih hrang hrangte a tarlang bawk. Vohbik a mi, Jawaharlal Nehru University a Ph.D bei mek Lalbuatsaiha, mitdel chuan a chanchin leh tawnhriat hrang hrangte a sawi a, mitdel a nih avanga Delhi a hnualsuat an hlawh ngai loh thu leh Mizoram-ah anmahni duat a kawng kawhhmuhtu an tlem thu a sawi a. A zirna kawngah puibawmtu mi tha tak tak a hmuh thu a sawi bawk. Mitdel R.S Lalrinpuia, Saiha chuan a chanchin sawiin a fanu thla 17 a hmuh hnuah a mit a del tak thu leh zirna chhunzawm a Saiha College atanga BA zovin tunah Saiha-ah PHE Dept. hnuaiah a thawh mek thu a sawi. Mitdel bawk Chhanchhuaha, Kawnpui chuan a naupan tette atanga ek-in a den avanga a mit a del thu leh zirna chhunzawmin Hrangbana College atanga BA (PA) a zawh hnuah Forest Dept.-ah Forester/Forest Guard dila, rualbanlote tana sorkar-in reservation a siam chu Dept. lamin an hriat loh thu leh nasa taka a beih hnuah a hlawhtlin thu a sawi. Mizoram sorkar chuan Disability Act tlawhchhan hian tunah rualbanlote tan Commissioner la-in staff turte pawh a buaipui mek tih Social Welfare Dept. hotute chuan an sawi a, rualbanlote hamthatna leh an chanvo neihte zahsak a, an phak tawh hna zawn kawngah Mizoram sorkar leh mipui kan thanharh a tul zia uar takin an sawi a ni. Kumtinin Dec. 3 hi Rualbanlote Ni a hman niin SCERT bultumin nimin seminar hi neih a ni. Pi Vanramchhuangi (Ruatfela Nu) chuan lawmthu sawiin hunhnung a chang a ni.

The Lawngtlai Post

Lalngheta Ralte (Ma-Ngheta) Electric Veng, Lawngtlai , Lawngtlai Dist. Phone: 9862843773 e-mail:lalnghetaralte@gmail.com

Post a Comment

Previous Post Next Post