Novemebr Ni 15 atanga tan ni thum awh tur NRHM/RCH/EPI Review Meeting chu nimin khan chhunzawm a ni a. Health Minister Pu Lalrinliana Sailo chuan he hun hi a hmanpui. He Meeting ah hian Dr. Lalthanga, State Programme Officer (RCH) chuan tun dinhmuna Mizoram Infant Mortality Rate (IMR) chu SRS Bulletin 2009 ang chuan mi 36 an ni a ti.
Khuallian Health Minister chuan Hepatitis ‘B’ Vaccine chu Mizoram in Health lama a tihthat avangin hrivenna dang pek rual a pek theih turin a hawng a. North East State zinga Hepatitis ‘B’ Vaccine a thlawna sem hmasa ber tur kan nih thu a sawi a ni. Health Minister chuan tunhnaiah India rama hriselna lama hmasawn ber leh thawk tha ber lawmman 1-na kan dawn thu sawiin, hei hi a chhan chu AIDS dona kawnga hmalakna te, Blood Donation lama kan tihthat vangte leh thawktute thawhrim vang anih thu a sawi a. Eye Bank pawh North East State zinga nei hmasa ber kan nih thu a sawi bawk a. Tun atang chuan CMO te power tam zawk pek an nih tur thu te, Directorate atang pawhin Monitoring leh Evaluation ngawrh taka tih thin a nih tur thu te, NRHM pawh guideline angin dik taka kalpui anih tawh tur thu a sawi bawk a ni. He Review Meeting hi vawiin 17.11.2011 (Ningani) thleng neih tura ruahman a ni.