MIZORAMIN INDIRA GANDHI NATIONAL SERVICE SCHEME AWARD A DAWNG

Ni 19.11.2011 khan Vigyan Bhawan, New Delhi-ah Pu Ajay Maken, Union Minister for Youth Affairs and Sports chuan Mizoram University chu National Service Scheme (NSS) 2010-2011 hmalaknaa a tihthat avangin State level Indira Gandhi NSS Award a hlan. Award hian tangkafai Rs. 1,00,000.00 (One lakh) a keng tel a ni. Pu Darchuailova, kum 2010-2011 chhunga State Liaison Officer, National Service Scheme, Sports and Youth Services, Govt of Mizoram hna lo chelh thinin Mizoram aiawhin IGNSS Award hi a dawng a ni. Pu Zodintluanga chuan IGNSS Award Mizoramin a dawng chu lawmawm a ti a, state lian zawk leh upa zawk tam tak karah Mizoram min thlang nalh hi a lawmawm hle a ni a ti. He IGNSS Award kan dawn theihna chhan hi Mizoram college hrang hranga Programme Officer te, volunteer te thawhrimna leh inpekna a ni a, anmahni khaikhawmtu State Liaison Officer taimaknate a fakawm hle a ni a ti. Award hlanna programme-ah hian Pu Ajay Maken chuan NSS kalphung chu hun inher danglam ang zela tih changtlung leh a kalhmang thlak a tul thu a sawi a, NSS volunteer tam zawk chu thalai an niin, khawtlanga an chanvo a pawimawh em em a; chuvang chuan an taksa pawh an tihchak a ngaih thu a sawi. NSS Programme leh scheme te hi a hun leh hmun azir zeal tihdanglam (flexible) theih a nih hi a pawimawh thu a sawi bawk a ni. Indira Gandhi National Service Scheme Award hi kum tin University, leh NSS Programme Officer leh Volunteer te hnenah hlan thin a ni. Kum dangah chuan University changtlung leh hlun deuh hlirin an dawng thin a, amaherawh chu kumin hian Selection Committee chuan University thar leh naupang zawk titha tak tak an awm ve thin avangin award hlan ve hi thain an hria a, kuminah hian Mizoram University chu University of Madras bakah thlan chhuahah a tel ta a ni. Kumin hian India ram hmun hrang hranga NSS unit Programme Officer 10 leh volunteer 30 hnenah IGNSS Award hi hlan bawk a ni.