MCU ten Tui Metre Rent leh Petrol pawlhdal an ngaimawh

Mizoram Consumer Union chuan tunlaia petrol pump te petrol pek chhuah teh dan a dik tawk lo nia sawi leh pawlh dal nasat nia sawi chu an enghelh thu an tarlang. Hemi chungchang hi Mizoram Consumer Union Executive Committee, thukhawm chuan an sawiho a, petrol teh dan chu a dik tawk em tih leh a quality a tha tawk em tih enfiah thuai turin thuneitute an ngen a ni. Hemi bakah hian December ni 13-a Zoram pum huapa Annual General Meeting vawi 15-na neih tur chungchangte an sawiho a, he Annual General Meeting hi Aizawl Venghluia Central Hall-ah neih ni se, thu ngaihtuah tur nei Unit hrang hrang leh District Hqrs. te chuan December ni 5-aia tlai lovah an agenda, Hqrs.ah thehlut kim vek se tiin thu an dah a ni. He Executive Committee thut khawmna-ah hian tun hma lama dan dik lova tui metre vuah, Court-in dan dik lova vuah nia a pawm atanga tun thlenga metre rent, PHE Department-in a la lak zuina connection thenkhat a la awm nia sawi a ni a, Consumer Union hruaitute chuan tui bill ruala metre rent, thla khata Rs.10/- lak thin chu dan anga tihtawp tur a nih thu sawiin, metre rent chawi an la awm chuan PHE Department-a tui sem chhuah lam viltu, Executive Engineer hnenah an tui bill xerox copy nena thehlut turin an ngen nghal bawk.