Blindcare Control Society of Mizoram ten Chanchinbumite nimin khan an kawm

Nimin khan Blindcare Control Society of Mizoram hruaitute chuan Aizawl Press Club ah chanchinbumite an kawm a, mitdel kawngsira zai thin te tanpui turin an pawl chu Oct.19,2011 khan din a ni an ti.BCS Chairman KT Hmar chuan Mizoram chu kutdawh awmlohna ram a ni tiin tuipui ral thlengin an lo sawi thin a, mahse kum hnih khat lek chhungin kutdawh hi kan pung ta hluai mai a, hei hi Kristian ram tan chuan a zahthlak hle a ni. kutdawh kan tih mai, a bikin mitdel te tanpui dan hi awm se kan duh a, sawrkar hnathawk te hian thla khatah Re. 1 pe thei hram se tih kan ngen pui a, hei hi Chief Minister hnenah pawh thlen kan tum a ni. Hei bakah mitdel te tan hian eizawnna kawng dang an thawh theih ang angte ngaihtuah sak kan tum bawk a ni a ti. BCS chuan mitdel tanpuinan lucky ticket te an siam bakah theitui te an zuar thin a, mitdelte tana mit pe turin an campaign thin tih an sawi bawk. Hei bakah hian mitdelte pual hian Blindness day siam nise, mipuiten an ngaihsak deuh zawk an rinthu an sawi bawk. Press mite zawhna chhangin Aizawl khawpui ah kawngsira zai thin mitdel 8 an awm a, Mizoram chhungah mitdel leh mit thalo 8000 vel an awm nia an hriat thu an sawi bawk.