Arunachal Pradesh State atangin Press Team 13 te chuan nimin zing dar 1 khan Aizawl an thleng a, Press Team hi Pu Obang Tyang, Dy. Director, I&PR, Arunachal Pradesh chuan a ho .
Nimin chawhma lam khan Press Team te hian Rajiv Gandhi Stadium, Mualpui a buatsaih mek leh A.R. Ground cheithat mekte an tlawh a, I&PR Department leh Sports & Youth Services hotuten an tawiawm
Chief Minister Pu Lal Thanhawla chuan Press mite hi lo ngai pawimawhin, chawhnu dar 2 khan a office a lengah a sawm a, Mizoram kut chhuak an hriat rengna tur thil te a hlan a ni. Chief Minister chuan Press Tour hian North East State hrang hrang te inkara inunauna leh inpumkhatna tinghetin hmarchhak state ten harsatna leh buaina kan tawh thin tam tak a tiziaawm ngei ang, a ti.
Press Team te hi nizan khan Zarkawt Biak In thalai inkhawm an tel a,vawiin hian Falkawn Mizo khua an tlawh bawk ang a, Aizawl khawpui fantir an nih hnuah tlai dar 6 ah Information & Public Relations Department buatsaih chawhlui Tourist Lodge, Chaltlang ah an kil ang.