October Mi 21 khan Lawngtlai a SSA, Block Resource Centre Hall ah, National Rural Health Mission bultumin Lawnghtlai District chhung a Naupang thi leh Raicheh athi chungchang leh Hriselna lam hawi hmalakna chungchang, Lai Autonomous District Council Member te nen zirhona hun neih a ni a,he Sensitization Workshop, Dr. H.C.Thangkima CMO Lawngtlai kaihhruai ah hian he hun hmanpuitu Pu C.Ngunlianchunga chuan NRHM hmalakna vangin hriselna kawng ah hmasawnna duhawm tak tak hmuhtur a awm mek laiin, Lawngtlai District chu kawng engkim ah District hnufual a nih vangin hriselna lam a hmalakna chuan duhthu a sam zo lo a ni a ti a, hriselna lam a chaktaka hmalakna kalpui a nih theih nan tanrualna tha a pawimawh a ni a ti a, Raicheh a thi leh Naupang thi tamchhan pawh chenna hmun in a zirloh vangte, thawktuten an vil hneh tawkloh vangin, mihringte nunphung a la hniam vangte a ni a ti. Dr.Gordon Zohmingthanga, Mission Director NRHM chuan hetiang workshop buatsaih a nihna chhan chu Hriselna lam a hmalakna ah hian Health Department chauh rinchhan a fuh ber loh vangte, ram changkang ah chuan mipui kut ah hriselna hi thuitak a innghah tawh vangin Mizoram ah pawh ram hruaituten hmalakna te chiangtaka an hriat a, hmalakna tur duan leh hmalakho a tul zia te an hriat deuh deuh theihna tur a nih thu a sawi. Report a tarlan a nih dan in Lawngtlai District ah Health Department a thawktu an indaih loh hle a tun dinhmun ah District Hospital-1, Community Health Centre-1, PHC-5, Main Centre-8, Sub-Centre-39 leh ASHA Workers 174 an awm mek a, mipui 1,24,889 zet an huam chhungah an awm a ni., kum kalta 2010-2011 chhungin naupang kumkhat hnuailam thi 34 awmin naupang kumkhat hnuailam 1000 zel ah 22 thi ang a ni.Sensitization Workshop neih ah hian LADC Member 28 ah 14 an tel.