National Highway, a lamtawia NH hi India ram State hrang hrang inkalpawhna, State khawpui theuhte zawmtu leh State pakhat chhungah pawh hmun pawimawh zawmtu atana duan a ni. Heng NH -te hi India Sorkar-in NH ni tura a puan dan indawta number pek vek an ni. NH Lamliante hi Sorkar laipui ta, a sialna leh enkawlna pawisa zawng zawng pawh Central Sorkar tum vek a ni. Kawng pawimawh dan a zirin Single Lane, Double Lane, Four Lane etc. a sial an ni. Tunah chuan NH zawng zawng chu a nilo berah Double Lane ni vek tura ruahman a ni.
Mizorama kan NH neih hmasak ber chu NH - 54: Silchar - Aizawl - Serchhip - Lunglei - Tuipang Road hi a ni. NH a nih tirhte kum 30 vel kalta atang khan Border Roads Organisation (BRO) kutah India Sorkar-in a dah a, an enkawlzui a, Double Lane-a sial tura tih kum tam tak hnuah pawh Double Lane-a sial chu a la tlem hle a ni. India Sorkar-in BRO enkawl hi tha a tih loh avangin kum 8 vel kalta atang khan Mizorama NH awm thar NH-150: Seling - Tipaimuk te, NH-44 A : Sairang - Mamit - Tripura, NH - 154 : Bairabi - Bilkhawthlir- te chu BRO kuta pe lovin Mizoram PWD kutah a pe ta a. Heng kawngte hi NH-a puan tirhte atanga tun thlengin Mizoram PWD chuan a enkawl ta a ni.
BRO hi ram dang nena inrina hrul, border area-a lamlian sial tura din a ni a. India leh China kum 1960-a an indo hnu lawk khan border area-a kawng laihthat tul zia hriaa BRO hi din a ni. BRO hian Project hming hran hran neiin, project tin chu Chief Engineer -in a ho zel a. Mizoram, Manipur, Nagaland, Arunachal Pradesh, Maghalaya, Assam, Tripura, Sikkim, Jammu & Kasmir leh Himachal Pradesh -ah Project hming hran theuh neiin an awm a. Mizorama awm chu Project Pushpak tih a ni. An hmunpui Delhi a ni a, Defence Ministry hnuaia awmin, Lt. General chu Director General vuahin an hotu ber a ni.
Kum 15 liamta atang khan NH enkawltu Ministry of Road Transport & Highways chuan BRO hi NH enkawl tur hian an duh lo a, kum 10 kaltaa Silchar - Bagha kawng a chhiat lai pawh khan Mizoram PWD Chief Engineer hnenah NH enkawl tura dilna ziak turin an lo rawn tawh thin a, mahse an dil duh ngai lova. Hun a lo kal zel a, China ramri hrul vela lamlian dinhmun India Sorkar-in an thlirkir chuan duhthu a sam lo chauh pawh ni lovin, China an tluk lo hle tih an hmu ta a. BRO hian a din chhan thawk mumal lovin NH lamah a inhmang nasa hle tih an hmuchhuak a. BRO hotute chuan an mawhphurhna thawk chak tur chuan NH lam an tinsan a tulin an hria a, chubakah Transport Ministry pawhin BRO chu an hna a tha lovin an senso a tam bawk avangin NH enkawl turin an lo duh lo ve hle bawk si a. Hengte avang hian India Sorkar laipui chuan State PWD nei tha apiang hnenah an State chhunga NH enkawl mawhphurhna pe vek turin thutlukna a siam ta a ni. Manipur rambuai vanga State PWD -in a zuam loh avanga pek loh tih loh chu State tam zawk hnenah NH chu pek a ni ta a ni.
NH - 54 pawh hi Mizoram Sorkar leh PWD lamin an dil vang ni hauh lovin India Sorkar-in a policy a thlak avang zawkin Mizoram PWD kuta hlan a ni. State Sorkar leh a changtu tur PWD pawh zawt hmasa lovin NH thar an enkawl danah a dang pawh enkawl theia ngaiin Mizoram PWD kutah he kawng hi pe turin Ministry of Road & Highways chuan May 2008 khan hriattirna a chhuah ringawt a ni zawk. Chutianga order awmhnuah BRO lamin pek mai an tum loh avangin Mizoram Sorkar-a mawhphurtu ten an nawrzui ve ta chauh a ni. India Sorkar policy anga an hotu lamin PWD kuta hlan tura thutlukna awm hnuah Mizoram Pushpak (BRO) hotute hian an ui avangin Mizoram PWD kutah rei tak hlan duh lovin, an kuta awmzui turin dilna Sorkar laipuiah an thehlut ve hnuhnawh a, chumi chhung chuan a hma atanga repair ngai tawh kha repair lovin an dah zui reng avangin kawng hi chhe ta em em a ni. National Highway thar 3 bakah Silchar - Aizawl - Lunglei kawngpui PWD kuta a awm tak avang hian a enkawl turin Chief Engineer leh a hnuaiah Circle SE bial 2 leh Division EE bial 4 siam a lo nita a ni.
Project Pushpak (BRO) hotu ten NH-54 an kuta pekir leh tura kum 2009-a an dilna Central Sorkar-in a phal tak loh avang leh an kawng chhe lutuk avanga Lunglei lama lirthei neitute nen buaina an tawh tak fo avangin April 2010 khan Mizoram PWD kutah an hlan ta chauh zawk a ni. PWD -in a enkawl hian kawng siamna estimate atanga 9 % zel hi State Sorkar hnenah Agency charge atan Central-in a pe thin a, estimate hi vaibelchhe tel anih zel avangin agency charge ngawt pawh hi State pachhe tan chuan tha tham tak a ni.
Heng thuziak tlemte atang hian, NH enkawl tur hian MNF Sorkar-in emaw, tuna Congress Sorkar-in emaw an dil vanga Mizoram PWD kuta hlan ni lovin, India Sorkar Policy avang zawka Mizoram PWD hian enkawl a ni tih kan hrechiang thei awm e. Chuvangin, Mizoram-in kawng tha kan neih theihna turin Mizoram PWD hi thuam chaka, hneh taka enkawl thei turin thawktute tihpun a tul hle a ni.