MZP Platinum Jubilee lawmna Zawlnuam a neih chu Home Minister Pu R. Lalzirliana n hmanpuiin Platinum Jubilee Magazine a tlangzarh a. Thu sawiin Minister chuan zirlai kalkhawmte chu zirna-ah quantity aia quality ngai pawimawh tur leh kut hnathawh uar leh zual tur-in a fuih a, MZP chu Sorkar khalh ngiltu leh thurawn pe thintu pawl pawimawh tak pakhat a ni a ti bawk. Pu Zira chuan chimralna lak ata Mizo hnam humhim tur te, eiruk leh hlemhletna do tlat tur te, Mizoram leh hnam tluchhe tur venghim tur te in zirlaite chu a chah a. Taimakna nen lo chuan hnam tluchhe tur kan veng thei dawn lo a; tih tak takna leh tumruhna tel lo chuan hnam kan humhalh thei dawn lo a ni a tiin a sawi. India ram state hrang hranga Mizo awmte inpumkhat leh inhmangaih tawn hi Mizoram tih zauhna atan a pawimawh a ti bawk. Khuallian chuan Mizoram Sorkar-in dik lo taka chetna a ngaizam mai mai lo a ni tih a sawi a. Hnamdangte hmuhsit leh tihduhdah ngawt hi Pathian duhdan a ni lo a ti bawk a ni.Khuallian chuan MZP chu zirlaite mamawh chhanna ni tura inbuatsaih tur te, zirlaite kaihruaia ram leh hnam tana mi chhenfak awm buatsaih tur leh hnamdangte zinga Mizoram leh Mizo-te hmel ti mawitu ni zel tur te-in a duhsakna a hlan a. Zirlai te pawh ram tan mahni zawna rinawm taka thawktu ni theuh tur in a fuih.